Imbinglay ni Glen Anthony Guingayan, Sr. Councilor ti Kasibu, Nueva a napilaan daytoy iti kaso a cyberlibel ngem napagtutongtonganda metten daytoy kadagiti maseknan nga indibidual.
Iti pannakiuman ti Bombo Radyo kenkuana, insalaysayna a ti nasao a kaso ket manipud kadagiti sumagmamano a barangay officials iti kabangibang a barangay.
Inlawlawagna a ti nasao a kaso ket gapu iti impablaakna nga umaw-awat dagiti dadduma a barangay officials iti agarup P10,000 tunggal bulan manipud iti nasao a mining company. Innayonna a nakumpirmar met daytoy kadagiti dadduma pay a barangay officials sakbayna daytoy nga impablaak.
Gapu iti dayta, impila dagiti barangay officials ti kaso a cyber liber idiay Regional Trial Court ti Bayumbong, Nueva Viscaya kontra kenkuana, agarup dua a bulanen ti napalabas.
Impeksana met a nagturong daytoy iti maysa kadagiti sesyon maseknan nga barangay no sadino nagkiddaw daytoy iti pammakawan kadagiti barangay officials gapu iti impablaakna. Kalpasan daytoy, immanugot met dagiti barangay officials nga idalanda laengen daytoy iti areglo.
Iti baet dayta, kinunana nga ekspektarenna nga adda latta ti maipaulog a warrant of arrest kontra kenkuana gapu ta naipilan ti nasao a kaso idiay korte. Nupay kasta, impettengna a nangipila metten daytoy ken ti abogadona iti motion for reconsideration.
Mangnamnama met daytoy a masolbar ti nasao a kaso iti korte gapu ta adda metten a napagsasaritaanda kadagiti maseknan a barangay officials. //kcs//
