BAGUIO CITY – Manamnama a sumango iti kaso a homicide wenno pammapatay ti maysa a babai gapu iti panangbagsolna iti live-in partner-na a nangitunda iti ipupusay daytoy sadiay Fairview, Baguio City idi kalman.
Maibasar iti imbestigasyon ti pulisya, nagi-inom ti arak ti lalaki a biktima, ti babai a suspek ken dagiti papagayamda iti uneg ti ab-abanganda a balay agingga naaddaan dagiti dua iti nabara nga argumento.
Iti salaysay ti suspek, tinungpa ken induron daytoy ti biktima.
Maatap pay nga inyawat ti biktima ti kutsilyo iti suspek ken kinaritna a bagsolen daytoy ti suspek.
Binagsol met daytoy ti suspek gapu iti panakasuronna ngem kalpasan ti sumagmamano nga oras ket personal a simmuko ti suspek iti istasyon ti pulisya ken isalaysayna ti napasamak.
Dagus a nagresponde dagiti pulis ken inturongda ti biktima iti pagagasan ngem naideklara daytoy a dead on arrival.
Naamuan a natamaan ti barukong ti biktima.
Narekober iti crime scene ti naaramat a kutsilyo nga agatiddog iti 12 a pulgada.
