BAGUIO CITY–Bimmaba ti bilang ti krimen sadiay Itogon, Benguet gapu iti naingetan nga implementasion ti liquor ban kabayatan ti community quarantine.
Sigun kenni Police Major Rommel Sawatang, hepe ti Itogon Municipal Police Station, bassit laeng ti mailislitada a kaso ti krimen ita a panawen ti pandemya.
Dinakamatna a kadawyan a rason iti krimen a mapaspasamak sadiay kadagiti kallabes ket Itogon ket gapu iti impluwensiya ti arak.
Impanakkel ti opisial a manmano laengen ti matiltiliwda nga indibidual a mairamraman iti krimen malaksid laeng kadagiti makemkemmegda a wanted persons.
Gapu iti daytoy, ingetan pay ti pulisya ti panagbantayda kadagiti border checkpoints a kabinadangda dagiti nagduduma nga opisina ken ahensia ti gobierno.
Immapela met ni Major Sawatang kadagiti umili ti Itogon a makikoordinarda a dagus kadagiti otoridad iti kanito makasalawda kadagiti mapagduaduaan nga indibidual.
