Maisagsaganan ti kaso a maipila kontra iti driver iti private mini bus a nangitunda iti aksidente sadiay Crystal Cave, Bakakeng Central idi laeng kalman, May 10.
Iti panakiuman ti Bombo Radyo Baguio kenni Police Major Marcy Grace Marron, Public Information Officer iti Baguio City Police Office,kinunana a mapilaan ti nasao a driver iti Reckless Imprudence Resulting in Damage to Property with Multiple Physical Injuries.
Ti nasao a driver a nangimaneho iti Mitsubishi Tourist Bus ket agtawen iti 45, ken residente iti Caba, La Union.
Kabayatanna, agtaltalinaed paylaeng met iti pagagasan ti driver ti Black Honda Click 125 motorcyle kalpasan ti panakaoperana ita nga aldaw.
Ti nasao a motorcycle rider ket agtawen iti 22, estudyante, ken reisdente iti Cabanatuan City, Nueva Ecija.
Immuna metten a nadischarge dagiti sumagmamano a pasahero a nakalugan iti nasao a minibus kalpasan ti panakataming dagitoy.
Dagiti sangapulo ket maysa a pasahero ket pakairamanan ti dua a senior citizen nga agtawen iti 64, maysa a menor de edad wenno agtawen iti 17, ken dagiti daduma pay nga agtawen iti nagbaetan iti 24 agingga 57.
Dagitoy ket pasig a residente iti nagduduma a paset iti Agoo, La Union.
Maipalagip nga idi kalman pasado alas diez iti agsapa ket napasamak ti vehicular traffic accident nu sadino, nagdinnungpar ti maysa a puraw a Mitsubishi tourist bus ken nangisit nga Honda Click 125 motorcycle.
Kasaruno dayta ket imbinglay met ti maysa kadagiti pasaheros nga immuna a nadungpar ti mini bus ti motorsiklo sakbay a natuled daytoy.
Rumrumwar met a mechanical defect wenno loose brake ti rason iti nasao nga aksidente.//Bombo Genzel Depayso
