BAGUIO CITY – Imbasura ti piskalya ti kaso a panaglabsing iti RA 11038 wenno iti Expanded National Integrated Protected Areas System (NIPAS) Act of 2018 nga impila ti lokal a gobyerno ti siudad ti Baguio seknan iti naigagara a panakapapatay ti 45 a puon ti Benguet Pine Trees iti maysa a lote sadiay deppaar ti Legarda Road.
Sigun kenni Victor Gorinto, Development Management Officer III ti City Environment and Natural Resources Office (CENRO), maysa a nagbasaran ti piskalya iti panakaibasura ti kaso ket saan a kanayon ti Legarda Road kadagiti protected areas iti sidong ti NIPAS ditoy rehiyon Codillera kas maibasar iti nasao a linteg.
Inlawlawagna a ti nasao a lote ket maysa nga initial component a saan a paylaeng a maibilang a protected area gaputa daytoy ket maipoproseso pay sadiay Kongreso.
Kinunana pay a sakbay a mapagbalin kas protected area iti sidong ti NIPAS ti maysa a lugar ket nasken a dumalan daytoy iti atiddog a proseso sakbay a maipangato iti Kongreso.
Nupay kasta, dinakamat ni Gorinto nga ur-urayenda ti sumaruno nga addang ti legal office ti lokal a gobyerno ti siudad tapno madusa dagiti nangpapatay iti 45 a puon ti pine trees. (-with Bombo Nikki Agsiweng)
