Mangipila itan ti Office of the Ombudsman iti kaso a plunder ken graft kontra kenni Senator Loren Legarda ken ti anakna a ni Batangas 1st District Rep. Leandro Leviste seknan iti P10 Billion a solar projects.
Sigun kenni Ombudsman Jesus Crispin Remulla, naduktalan dagiti imbestigador ti Ombudsman a maatap a nagkukumplot da Senador Loren Legarda, Congressman Leandro Legarda Leviste ken sigud a DOE Secretary Alfonso Cusi tapno magun-udda ti kontrata iti proyekto ti gobierno babaen iti legislative ken regulatory actions.
Rumrumar iti report ti Department of Energy (DOE) a ti Solar Philippines nga impasdek ni Leviste ken nakarehistro kas Solar Philippines Power Project Holdings Inc.
Napaay daytoy nga ipatungpal ti inkarida a koriente iti uneg ti naituding a panawen.
Gapu iti dayta, kinanselar ti DOE dagiti kontrata ti kompania ken nangipaulog iti P24 billion a multa.
Sigun iti Ombudsman, dumanon iti P10.44 billion ti total unpaid financial obligations ti nasao a kompania iti gobierno gapu iti terminated contracts.
Inlawlawag ni Remulla a karaman ni Senator Legarda iti nasao a kaso agsiputa, nagun-ud ni Leviste ti prangkisa idi agtawen laeng iti 21.
Innayon ni Remulla a saan a magun-ud daytoy ni Leviste no saan a tinulongan ni inana nga idi ket chair ti Senate Finance Committee.