Ngimato ti kaso iti acute respiratory infections kadagiti evacuation centers a nagbakwitan dagiti tattao a naapektaran iti Severe Tropical Storm (STS) Kristine.
Sigun iti Department of Health, immado iti kaso ti nasao a sakit gapu iti kinaasideg dagiti evacuation centers, isu’t gapuna a nalaka a maiyakar ti nasao a sakit.
Maibasar iti sentomas kas iti panaguyok, panagsakit iti bagi ken dadduma pay, naduktalan a maysa daytoy nga influenza-like illness.
Gapu iti dayta, insayangkat ti Department of Health iti panagsukimat iti nasao a respiratory infections, karaman ti leptospirosis ken diarrhea nangruna kadagiti ubbing.
Kabayatanna, guyguyuguyen ti nasao nga ahensia dagiti evacuees nga agusarda iti facemask bayat tapno malapdan ti panagwaras iti nasao a sakit.
Maipalagip a dumanon iti agarup 7.13 million a tattao ti naapektaran ken agarup half million dagiti residente a naawanan iti pagataengan gapu iti panagdalapos ti Bagyo a Kristine.
