Ngimato ti kaso ti vehicular traffic incident iti syudad ti Baguio sigun iti Baguio City Police Office (BCPO).
Iti panakiuman ti Bombo Radyo Baguio kenni Pmaj. Marcy Grace Marron- PIO-BCPO, dumanon iti 371 ti pakabuklan a nairekord dagitoy idi May 27, 2025.
Nangatngato daytoy no idilig iti napalabas a tawen iti umiso metlaeng a bulan a dumanon iti 322.
Iti nasao a datos, kaaduan a nailista dagitoy ti reckless imprudence resulting to damage to properly a dumanon iti 301.
Sarunuen daytoy ti kaso iti reckless imprudence resulting to physical injury a dumanon a 58 ken ti reckless imprudence resulting to homicide a dumanon iti walo nga insidente.
Kabayatanna, kadawyan a mairamraman iti aksidente dagiti private vehicles no sadino, dumanon iti 359.
Kinuna pay ni Pmaj. Marron a dumanon iti 350 dagiti nailista dagitoy nga aksidente a nakairamanan ti motor vehicle bayat a 17 ti nakairamanan ti motorcycle.
Kadawyan a rason ti insidente ket gapu iti drivers/humans error kas ti panagmaneho nga addaan iti impluwensya ti arak, mechanical defects ken road conditions.
Gapu iti dayta, agpalpalagip dagiti kameng iti Polisya kadagiti motorista a kanayun daytoy nga agannad.
Iti sabali a bangir, impeksa ni Mayor Benjamin Magalong a very alarming ti panagngato ti kaso ti vehicular traffic incident.
Manarimaan met ti panagadalda tapno malimitaran dagiti nasao a vehicular traffic incident iti siudad.//Bombo Noveh Organo