Inaprobaranen ti Department of Justice (DOJ) ti pannakaipila iti korte ti kaso a qualified trafficking and sexual abuse and exploitation of children kontra iti maysa a nanang a nangilako iti online kadagiti live sex videos dagiti tallo a menor de edad nga annakna.
Nabigbig daytoy a ni Jonalyn J. Rivera wenno pagaammo met kas Jennica Maine.
Napilaan daytoy iti kaso gapu iti panaglabsingna iti Republic Act No. 9208 wenno Anti-Trafficking in Persons Act gapu iti panangbiktimana kadagiti annakna nga agtawen iti 12,5 ken 3.
Gapu iti daytoy, dagus met a naarestar ti nasao a suspek bayat a narescue metten dagiti tallo nga annakna.
Kabayattana, impasigurado ni Department of Justice (DOJ) Secretary Jesus Crispin C. Remulla, a masolusyunan ken maipaayan iti pannusa dagiti agaramid iti kastoy a banag.
Indagadagna met iti publiko a nasken a tumulong dagitoy apaman nga adda maimatanganda a kastoy nga insidente.
