BAGUIO CITY – Naipilan iti City prosecutor’s office ti kaskenan a kaso kontra kadagiti 14 nga indibidual ken ti maysa a kompanya a maitudtudo a nangipablaak iti social media iti pribado nga impormasyon dagiti nagpositibo iti COVID-19 ditoy siudad ti Baguio idi Hunyo.
Sumangsango dagitoy iti kaso a panaglabsing iti Republic Act 11332 wenno ti Mandatory Reporting of Notifiable Diseases and Health Events of Public Health Concern Act, in relation iti Republic Act 10175, wenno iti Cybercrime Prevention Act of 2012.
Sigun kenni City Mayor Benjamin Magalong, iggem itan ti prosucutor ti joint complaint-affidavit kontra kadagiti maseknan nga indibidual ken ti kompanya.
Maipalagip a nangipaulog iti pammilin ni Mayor Magalong iti Regional Anti-Cybercrime Unit ti rehion Cordillera para iti pannakasapul kadagiti indibidual a nangipablaak iti pakabigbigan ken dadduma pay a pribado nga impormasyon dagiti covid positive ditoy siudad nga awanan permiso manipod kadagiti otoridad.
Mainaig iti daytoy, nagkiddaw met iti sag-P200,000 manipud kadagiti akusado dagiti nagreklamo para iti moral damages, anxiety, depression and sleepless nights nga intunda iti inaramid dagiti nangipablaak kadagiti impormasyon dagitoy. (report ni Bombo Brigitte Marcasi)
