Pinilaanen iti Department of Environment and Natural Resources(DENR) iti kaso nga adiministratibo ken criminal ti maseknan iti Monterrazas project idiay Cebu City gapu iti nakaro a panakaputed dagiti kaykayo.
Sigun kenni DENR Assistant Secretary for Legal Affairs and Enforcement Norlito Eneran, naipila ti kaso a panaglabsing iti Section 77 iti revised Forestry Code.
Iti inventory iti nasao nga ahensya idi 2022, dumanon pay iti 745 a pu-on iti kayo ti adda iti disso a nakaibangunan iti proyekto ngem dumanon laengin iti 11 iti kaudian nga inspeksyon dagitoy.
Malaksid iti massive tree-cutting, naduktalan metlaeng a saan a nakapagtulnog ti nasao a korporasyon iti 10 manipod iti 33 a kondisyon a nakalanad iti Environmental Compliance Certificate (ECC) daytoy.
Daduma pay kadagiti linabsing ti korporasyon ti Clean Water Act , ken ti Philippine Environmental Impact Statement (EIS) System, kasta metten ti nadadael a detention ponds a naidisenyo koma a mangimanihar iti stormwater runoff.