Impakaammo ti Department of Health (DOH) a ngimmato ti kaso ti acute respiratory infection kadagiti evacuation centers kalpasan ti Severe Tropical Storm Kristine.
Gapu iti dayta, impetteng ni Health Secretary Ted Herbosa a nainget ti monitoring dagiti medical teams kadagiti evacuation centers partikular kadagiti ubbing.
Nagballaag pay dagitoy nga agaramat iti facemasks tapno saan a maalisan iti nasao a sakit.
Ti sintomas daytoy ket ti panag-uyek, runny nose ken dadduma pay.
Sigun kenni Herbosa dagus a nagwaras daytoy agsipud ta agdidikket dagitoy kadagiti evacuation centers rason nga agiinalisda.
Malaksid iti dayta, kinunana metlaeng nga imonmonitor dagitoy ti kaso ti diarrhea bayat a nangipaay metten dagitoy iti purification tablets kadagiti pamilya kadagiti evacuation centers tapno masigurado a natalged dagiti danum nga in-inumen dagitoy.
Innayonna pay a posible a ngumato ti kaso ti leptospirosis inton sumaruno a lawas kasaruno ti mapaspasaran a panaglayos nga intunda ti naglabas a bagyo.
Aw-awaganna met ti publiko a dagus nga agpakonsulta kadagiti doctors iti kanito a makaparikna dagitoy iti saan a nasayaat.