Impakaammo ti Itogon Municipal Agriculturist Office (MAGRO) a dumanon iti 254 a baboy ti nagpositibo iti African Swine Fever (ASF) idiay Barangay Loacan, Itogon partikular iti Sitio Tolibeng ken Labilab.
Sigun iti pablaak ti lokal a gobyerno ti Itogon, inwaragawag ni Veterinarian II Dr. Franklin Balanban a manipud iti bilang a 254, 170 kadagitoy ti pimmusay bayat a dua ti naparti sakbay a naireport.
Ti nabatbati nga 82 a baboy ket napapatay ken naikali babaen metlaeng iti panangasistar iti Itogon Municipal Agriculturist Office (MAGRO), Benguet Provincial Veterinary Office ken Barangay Loacan officials.
Iti sabali a bangir, ngimmato metlaeng ti kaso ti ASF idiay Barangay Tuding no sadino dumanonen iti 188 ti nakumpirmar a nagpositibo. Dumanon met iti 73 ti nagpositibo idiay Sitios Ilod ken Supang idiay Poblacion bayat a nairekord metlaeng ti kanayunan a kaso idiay Virac.
Sigun kenni Dr. Balanban, addu dagiti wagas iti pannakaiyakar ti nasao a virus.
Karamanen ditoy panangkaan wenno panangidispose kadagiti infected a karne ti babot wenno pork products a positibo iti nasao a virus.
Malaksid iti dayta, mabalin pay a maiyakar ti virus babaen kadagiti contaminated a karayan ken creeks nangnangruna nu adda dagiti saan a naidispose a nasayaat a bagi ti natay a baboy kadagiti waterways.
Innayon ni Dr. Balanban a posible metlaeng a maiyakar ti virus babaen kadagiti walang nga aso ken nakalubos a manok.
Kagiddan dayta, inyunay-unay ni Dr. Balanban ti kinapateg iti responsable a panangidispose kadagiti natay nga ayop ken nagpallagip daytoy kadagiti hog raisers a saanda kuma a basta lattan ibelleng dagiti bagi dagiti natay a baboy kadagiti karayan, creeks, ken dadduma pay a waterways gapu ta mabalin nga agwaras ti nasao a virus.
Impettengna met nga agtultuloy latta ti monitoring ken surveillance nga isaysayangkat ti opisinada kaduada dagiti barangay officials ken Barangay Biosecurity Officers.
Mabalballakadan met dagiti ada ti tarakenna a baboy iti nasao a munisipyo nga ireportda a dagos nu adda dagiti makitada nga anyaman a sintomas iti panagsakit dagiti tarakenda a baboy tapno dagos a i-assess dagiti maseknan nga opisina. //kcs//