BAGUIO CITY – Nakumpirmar ti kaso ti African Swine Fever (ASF) sadiay Tinoc, Ifugao.
Kasaruno daytoy ti naawat ti Tinoc Municipal Agriculture Office mainaig iti panakatay dagiti baboy saiday Barangay Poblacion iti umuna a lawas ti agdama a bulan ti Nobyembre.
Naisumitir iti Regional Animal Disease Diagnostic Laboratory ti Department of Agriculture-Cordillera dagiti samples dagiti internal organs dagiti natay a baboy
Rimwar iti resulta idi November 19, 2021 a positibo iti ASF dagiti naisumitir a samples.
Gapu iti daytoy, mapalpalagipan dagiti agtartaraken ti baboy iti saanda a panaggatang kadagiti sibibiag, sadiwa wenno naiproseso a baboy manipud kadagiti lugar nga addaan ti kaso ti ASF.
Maikalkalikagum met ti panag-inget kadagiti biosecurity measures babaen iti innaldaw a panag-disinfect iti aglawlaw dagiti kulungan ti baboy ken ti panangikabil ti foot bath nga addaan ti disinfectant solution iti pagserkan ti pagtaraknan ti baboy.
Nakiddaw pay ti dagus a panangireport dagiti maseknan iti Municipal Agriculture Office no adda ti agsakit wenno matay a baboy dagitoy.
Maibilbilin met nga amin a baboy a makitaan ti sintomas ti ASF ket mai-isolate ken maikali.
Iyap-apela pay ti Tinoc Municipal Agriculture Office ti panangimplementar dagiti umili sadiay iti addang iti masakupanda a barangay tapnu maliklikan ti panagwaras sadiay ti ASF a makapapatay kadagiti taraken a baboy.
