BAGUIO CITY – Naipariten ti panakaiserrek ti meat products ken sibibiag a baboy iti masakupan ti Kiangan sadiay Ifugao.
Kasaruno daytoy ti panakailista ti maysa a kumpirmado a kaso ken sumagmamano a suspected cases ti African Swine Fever (ASF) iti nasao nga ili.
Naibilin met ti temporaryo a panakairikep ti municipal slaughter house ti Kiangan.
Inlawlawag ni Mayor Raldis Andrei Bulayungan a ti nasao nga addang ket saan a kontra kadagiti manufacturers ken producers ti meat products ngem ketdi, tapnu maprotektaran ti swine industry ti munisipyo, pakairamanan dagiti umili.
Naamuan nga adda metten ti ASF quarantine checkpoints sadiay Ibulao ken Pindongan a bambantayan dagiti pulis, agriculture office ken dagiti barangays officials.
Maipalubos met a lumabas sadiay Kiangan dagiti lugan a naglaon kadagiti sibibiag a baboy a maiturong sadiay Tinoc ken Asipulo la ketdi adda ti maiparang dagitoy a kaskenan a dokumento.
