BAGUIO CITY – Kontrolado latta dagiti kaso ti COVID-19 ditoy Baguio iti baet nga addan ti siudad iti Alert Level 3 wenno dagiti lugar nga adda iti nangato a kaso ti COVID-19 ken ngumatngato a healthcare utilization.
Iti interview ti Bombo Radyo Baguio, kinuna ni Assistant City Health Officer ken COVID-19 Mobile Vaccination team leader Dr. Celia Flor Brillantes a saan met a mapaspasaran ita ti full-capacity kadagiti ospital.
Dinakamatna nga iti napalpalabas a dua agingga tallo a lawas ket 17 agingga 45 a kaso ti kadawyan a mailislista iti siudad.
Innayonna a tarigagayda a maikabil amin kadagiti isolation facilities ken kadagiti ospital dagiti amin a naka-home isolation a nagpositibo iti COVID-19 tapnu maliklikan ti panagwaras ti coronavirus iti uneg ti babbalay dagitoy.
Imbinglayna pay nga adda ti maar-aramid a wagas tapnu mabigbig no Delta variant wenno saan dagiti kaso ti COVID-19 ditoy siudad.
Naamuan a puntiryada a mapalawa ti Baguio City Community Isolation Unit bayat nga agtultuloy ti panagbiruk ti siudad iti dadduma a disso nga agserbi a temporary isolation facility ken adda metten ti polisiya para iti panagbalin dagiti regular hospital beds kas intensive care unit beds.
