Bimmaba iti agarup 50% ti bilang dagiti kaso ti cybercrime iti rehion Cordillera a naireport nanipod January 1 agingga idi kalman, May 7.
Iti panakiuman ti Bombo Radyo kenni Police Colonel Maria Theresa Pucay, dadaulo ti Philippine National Police-Regional Anti-Cybercrime Unit- Cordillera,dumanun laeng iti tallo pulo ket lima(35) ti kaso a nailista iti baet dagiti nadakamat a petsa, nababbaba nu idilig iti innem a pulo ket uppat(64) a nailista idi napan a tawen iti kapada metlaeng a reporting period.
Sigun kenni Pucay, ti estafa ti mangmangruna a klase ti cybercrime iti rehion, sarunwenn ti access device, cyberlibel, online theft, ken identity theft.
Maibasar iti datus ti nasao nga opisina, bimmaba iti agarup sincuenta porciento ti bilang dagiti kaso a naireport kadagiti nadakamat a klase ti cybercrime.
Mainaig iti dayta, dinakamat ti opisyal a saan nga agleppas ti panagimbestigarda iti kaso apaman a matiliwda dagiti suspect.
Sigun kenni Pucay, agtultuloy latta ti koordinasyon dagitoy kadagiti maseknan nga ahensya ken opisina pakairamanan dagiti financial institutions tapno matrace metlaeng dagiti daduma pay nga adda pakainaiganana kadagiti kaso ti cybercrime.
Innayonna nga agtultuloy ti cyber patrolling dagitoy tapno maarestar dagiti suspect.
Gapu iti dayta,mabalballaagan ti publiko a saan a dagus a mamati dagitoy kadagiti maaw-awatda a mensahe nangruna nu agkidkiddaw dagitoy kadagiti datus a saan a rumbeng a maishare kasta met ti panagpanunot a naimbag sakbay a lukatan dagiti maipatpatulod a links.//Bombo Rob Dominguez
