BAGUIO CITY – Ngimmato ti kaso ti dengue fever a nailista iti probinsiya ti Benguet kagiddan ti masansan a panagtudtudona iti lokalidad.
Sigun kenni Benguet Provincial Health Officer Dra. Nora Ruiz, nailista ti 483 a kaso ti dengue fever ita a bulan ti Hulyo, nangatngato no idilig iti 369 a kaso idi napalabas a bulan ti Hunyo.
Inaklona a naalarmada gaputa nanayonan ti bilang dagiti pimmusay kalpasan a nakaptanda iti nasao a sakit, no sadino, adda ti dua a munisipyo a nakailista iti ipupusay gapu iti dengue fever.
Dinakamat ni Dr. Ruiz a liman a munisipyo ti Benguet ti addaanen ti kaso ti dengue fever.
Gapu iti daytoy, ipalpalagipna manen ti kanayon a panagdalus iti arubayan ken kadagiti disso a mabalin a pagbalayan ken pag-itlogan dagiti lamok, pakairamanan dagiti nakaimet ti dengue virus.
Inyunay-unayna pay ti panangsalwad iti bagi, dagus a panagpakonsulta no adda dagiti marikna a sintomas ken ti saan a panagisayangkat ti indiscriminate fogging.
