Bimmaba ti kaso ti dengue a nailista manipud Enero a-kwatro agingga Enero 24, iti agdama a tawen no sadino ket dumanon laeng daytoy iti 7,471 sigun iti Department of Health (DOH).
Bimmaba daytoy manipud iti bilang nga 25, 652 a kaso idi napalabas a tawen.
Gapu iti nangato a bilang idi napalabas a tawen, nangipatungpal ti Department of Health iti kampanya kontra-dengue wenno ti ” Taob, Taktak, Tuyo, at Takip”.
Iti agdama, sigun iti nasao nga ahensiya, epektibo ti nasao a kampanya kalpasan a nailista ti 71% a panagbaba ti kaso ti dengue iti pagilian ita a tawen.
Innayon pay ti ahensya a dakkel a tulong ti aktibo a pannakitinulong dagiti komunidad, lokal a gobyerno, ken health workers kas frontliner iti nasao a kampanya.
Nupay kasta, inyunayunay ti Department of Health a saan nga umdas daytoy tapno agbalin a kampante ti publiko nangnangruna iti panagbaliw ti panawen a posible a mangitunda iti panagngato manen ti kaso ti dengue.
Alalukoyenda met ti publiko nga agbalin a naridam a kanayun ken pagtalinaeden a nadalus ti aglawlaw tapno saan nga pagbalayadan dagiti lamok. // Bombo Karen Calpoe Sapirao
