Ngimmato ti kaso ti dengue iti probinsya ti Benguet iti 7% maibasar iti datos ti Provincial Epidemiology and Surveillance Unit (PESU) manipud iti bulan ti Enero a uno agingga Marso a dos ti agdama a tawen nga addaan ti bilang a 276 a kaso no idilig idi napalabas a tawen a 258 a kaso iti kapada a reporting period wenno panawen.
Iti panakiuman ti Bombo Radyo kenni Dr. Cham Bacuso, Medical Specialist 1 ti Benguet Provincial Health Office, impeksana a mabanbantayan ita ti munisipyo ti Mankayan gapu iti panagngato ti kaso ti dengue dagitoy manipud iti sangapullo a kaso idi napalabas a tawen ket nagbalin daytoy a tallo pulo ket pito a kaso iti nasao reporting period.
Sigun kenni Bacuso, sumarsaruno a mabanbantayan ti munisipyo ti Tublay a nakailista ti sangapullo ket tallo a kaso manipud iti uppat a kaso idi napalabas a tawen ken ti munisipyo ti Buguias nga addaan ti sangapullo ket siam a kaso manipud iti sangapullo ket maysa a kaso idi napalabas a tawen.
Malaksid iti dayta, mabanbantayan met laeng ti La Trinidad ken Sablan para iti sakit a dengue.
Kinuna ni Bacuso a dagiti kangrunaan a mabikbiktma iti sakit a dengue ket dagiti agtutubo nga agtawen iti sangapullo agingga sangapullo ket uppat.
Nu pay kasta, awan met ti nailista a pimmusay gapu iti sakit a dengue iti probinsya ti Benguet.
Kabayatanna, dagiti daduma pay a mabanbantayan a sakit iti probinsya ti Benguet ket ti typhoid ken influenza.
Imbinglay pay ni Bacuso a dagiti kangrunaan a sakit a mangituntunda iti ipupusay dagiti residente ket gapu iti heart disease, hypertension, cancer, pneumonia, stroke, ken diabetes.
Iti baet dagiti agraraira a sakit, saan met nga agsarsardeng ti Benguet Provincial Health Office a mangisayangkat ti information dissemination ken ti makikoordinar kadagiti nagduduma a barangay health workers ti nasao a probinsya tapno maliklikan ti panagraira dagitoy a sakit.
