BAGUIO CITY – Bimmaba iti 66 a porsiento ti kaso ti Hand, Foot and Mouth Disease (HFMD) a nailista ti Department of Health (DOH) – Cordillera manipud Enero agingga Abril ti agdama a tawen ditoy rehion.
Sigun kenni Nurse V Geeny Anne Austria ti Regional Epidemiology and Surveillance Unit ti DOH – Cordillera, dumanon iti 16 a kaso ti HFMD ti nailistada kadagiti nasoa a bulan, nababbaba no iti 47 a kaso ti HFMD a nailistada kadagiti kapada a bulan idi napalabas a tawen.
Kinunana a pito kadagitoy ti nailista iti siudad ti Baguio, uppat iti probinsia ti Benguet, tallo iti probinsia ti Kalinga ken saggaysa ti Apayao ken non-Cordillerans.
Dinakamatna a kaaduan a nakaptan iti nasao a sakit ket dagiti lallaki nga agtawen ti maysa agingga pito.
Gapu iti daytoy, iyap-apelana manen ti saan a panangiyaleng-aleng ti publiko iti umno a panang-ugas iti ima wenno ti nasayaat a hygiene tapnu maliklikan ti nasao a sakit.
Inyunay-unay pay ni Nurse Austria nga awan ti pilpilyen a kumpetan ti nasao a sakit nangruna ta nalaka daytoy a maala no saan a nadalus ti ima nga aramaten a mangan.