Dumanonen iti 5,835 ti nailista a kaso ti leptospirosis iti pagilian a Pilipinas ita a tawen sigun iti Department of Health (DOH).
Kaaduan kadagiti kaso ket nailista idiay National Capital Region iti bilang a 1,733, 632 a kaso met ti nailista idiay Central Luzon ken 561 idiay Cagayan Valley.
Sigun iti kaudian a datos ti Department of Health, bimmaba iti 19% ti pakabuklan a bilang ti kaso kumpara iti 7, 187 a nailista iti kapada a panawen idi napalabas a tawen.
Nupay kasta, impetteng ti nasao nga ahensya a saan a rumbeng nga agpakampante ti publiko nangnagruna ita nga agtultuloy ti panaglayos iti dadduma a lugar.
Impetteng metlaeng ti nasao nga ahensya ti kinapateg ti panagpakonsulta a dagos tapno mataming a dagos dagiti kondisyon ken maamuwan nu kasapulan ti prophylaxis wenno preventive medication.
Kabayatanna, binilin met ti Department of Education (DepEd) dagiti pampubliko a pagadalan nga adadda a paingeten dagitoy ti information campaign kontra iti dengue ken leptospirosis.