BAGUIO CITY – Ngimmato ti bilang dagiti kaso ti leptospirosis iti rehion Cordillera kas maibasar iti listaan ti Deparment of Health (DOH) iti umuna nga innem a bulan ti agdama a tawen.
Sigun kenni DOH-Cordillera Nurse V Geeny Ann Austria, nakailistada iti 28 a kaso ti leptospirosis manipud idi Enero agingga idi napalabas a bulan ti Hunyo, nangatngato no idilig iti 20 a kaso kadagiti kapada a bulan idi napalabas a tawen.
Nailista ti kaaduan a kaso ti leptospirosis iti Benguet a sinaruno ti Kalinga, Apayao ken Ifugao, Baguio City ken Mt. Province ken dagiti non-Cordillerans.
Kaaduan kadagiti nakaptan ti leptospirosis ket dagiti mannalon, laborers, minero ken adda ti maysa nga estudyante.
Inlawlawag ni Austria a maala ti nasao a sakit manipud iti isbo ti utot, aso, baka, nuang ken dadduma pay nga ayup a mangkontamina iti danum ken taraon.
Insingasingna pay ti panagaramat dagiti umili iti botas ken gloves ken ti panagpatalinaed iti nadalus nga aglawlaw tapno maliklikan ti leptospisis.
