Binilin ni President Ferdinand “Bongbong”Marcos Jr. ti Philippine National Police, Department of Justice ken dagiti dadduma nga ahensia ti gobierno a paingtenda ti kampaniada, kontra iti umad-adu a kaso ti online sexual abuse ken exploitaion kadagiti ubbing.
Malaksid iti dayta binilin ni President Marcos Jr. nga ad-adda a makitinnulongda, kadagiti pribado a sektor ken internet service providers iti lokal ken sangalubongan, kasta met ti panangisayangkatda iti awareness campaign kadagiti pagadalan ken komunidad.
Maibasar iti datos ti National Coordinating Center, kangrunaan a biktima iti online sexual abuse and exploitation of children (OSAEC) ken child sexual abuse and exploitation materials (CSAEM) dagiti ubbing nga agnanaed kadagiti rural areas, no sadino kaaduan nga agsaksaknap kadagiti probinsia ti Cagayan de Oro, Taguig City ken iti Metro Manila.
Sigun kenni Mico Clavano, Spokesperson ken Assistant Secretary ti Department of Justice, kameng ti pamilia dagiti biktima ti facilitator dagitoy ken kaaduan a babbai ti biktima, bayat a 14 percent ti bilang dagiti biktima a lalaki.
Kabayatanna, kinuna ti Philippine National Police a nasinged ti pannakitinnulongda kadagiti dadduma a ganggannaet a pannakabagi ti linteg, babaen iti Philippine Internet Crimes Against Children, nga adda iti sidong ti Philippine National Police Women and Children Protection Center.
