BAGUIO CITY – Bimmaba ti kaso ti panag-abuso kadagiti babbae iti probinsia ti Benguet.
Daytoy ti maysa kadagiti kangrunaan a naipadamag kadagiti babae a nakipaset iti panakarambak ti Women’s Month iti probinsia idi kalman.
Nailanad iti listaan ti Provincial Social Welfare and Development Office ti Benguet a manipud 2013 agingga 2017 ket nailista ti kangatuan a kaso ti panag-abuso kadagiti babbae ken iti annak dagitoy idi 2014 a dimmanon iti 456.
Nailista ti 340 a kaso ti panag-abuso kadagiti babae ken kadagiti ubbing idi 2013 ken ngimmato daytoy idi 2014 ngem bimmaba iti 369 idi 2015 ken ad-ada pay a bimmaba idi 2016 a dumanon iti 241 ken idi 2017 ket 154.
Sigun kenni DSWD-Cordillera regional director Janet Armas, ita a panawen ti teknolohiya ket dakkel ti maitulong daytoy iti panangiwarasda iti impormasyon seknan iti karbengan dagiti babae ken ti ubbing dagitoy.
Kinunana nga iti tinawen a panakarambak ti Women’s Month ket makitkitana ti in-inot a panakapunas ti sigud nga aramid dagiti babbae a panangipalubos dagitoy iti panaka-abusoda.
Dinakamatna nga agtultuloy ti panangikampanyada iti panangiruar dagiti babbae iti talento dagitoy tapnu mapasayaat ti bukodda a biag, ti biag ti pamilyada ken ti akemda iti kagimongan tapnu iti udina ket makatulong dagitoy iti panagdur-as ti pagilian.
