BAGUIO CITY – Ngimmato ti kaso ti scam iti siyudad ti Baguio iti agdama a kwarter ti tawen.
Iti datus ti Securities and Exchange Commission (SEC) – Baguio, 50% a nangatngato nu idilig idi napalabas a tawen.
Iti panakiyuman ti Bombo Radyo kenni Helen Veryan C. Valdez, Information Officer ti Securities and Exchange Commission (SEC)-Baguio, kinunana nga adun dagiti makabael a mangipila ti reklamoda kontra kadagiti scammers.
Kaadoan kadagitoy ket nabiktima ti online scam ken investment scam.
Impetteng ni Valdez a ti saan a panagbuteng dagiti biktima nga agreklamo ket isu ti maysa kadagiti mangpasardeng scammers kadagitu ipatpatungpalda a modus.
Gapu iti dayta, inyunay-unayna kadagiti asinoman a mabiktima ti scam a dagus nga agreportda kadagiti maseknan nga ahensya tapno maimbestigaran.
Malaksid iti online scams, dinakamat ni Valdez nga agraraira metlaeng ti casino financing operation nu sadino binallaaganda dagiti agents, brokers, ken salesmen nga ag-op-operate iti syudad ken iti kabangibang a lugar.
Iti sabali a bangir, impaganetget ni Valdez kadagiti korporasyon a delinquent, non-compliant, suspended, ken revoked a mangipiladan ti aplikasyonda para iti amnesty program ti Security and Exchange Commission (SEC) agsipud ta saanen a mailaylayon pay ti deadline dagitoy a naituding inton Disyembre 30, 2023.
Sigun kenkuana, dakkel a tulong daytoy kadagiti korporasyon agsipud ta maksayan ti penalties dagitoy nu maka-aplikarda iti nasao nga amnestiya.//Rob Dominguez
