Kinumpirmar ni Cyra Policarpio, Registered Nurse Mental Health Assistant iti City Health Services Office a dumanonen iti 41 ti kaso ti suicide iti siudad ti Baguio.
Iti pannakiuman ti Bombo Radyo kenkuana, imbinglayna a ti nasao a numero ket nairekord manipud Enero agingga iti Setyembre iti agdama a tawen.
Manipud iti nasao a bilang, 35 dagiti lallaki bayat a 6 ti babbai no saidno kangrunaan a wagas nga ar-aramiden dagitoy ket babaen iti strangulation ken poisoning.
Sigun kenkuana, nangatngato daytoy nu idilig iti 47 a nailista idi napalabas a tawen gapu ta dimmanonen iti 41 ti nairekordda iti laeng tallo a kwarter iti agdama a tawen.
Kaaduan kadagiti nasao a kaso ket nainaig iti tawen a 15-29 maibasar kadagiti maaw-awat ti CHSO a death certificates.
Innayonna a nupay mangipaalarma ti nasao a numero, agpokpokus da ita kadagiti initiative prevention a kasapulan tapno maaddressan ti nasao nga issue.
Kabayatanna, inlawlawag ni Policarpio a dagiti kaso ti panagkettel iti bukod a biyag ket multifactorial no sadino addu dagiti contributing factors pakairamanan ti financial difficulties nangnangruna iti panagsaknap iti online gambling, family and relationship problems, trauma, bullying, depression, anxiety ken dadduma pay.
Impeksana met ti kinapateg ti panagbalin ti maysa a kapamilya kas natibker a support system ti maysa nga indibudual a makapaspasar iti mental health issues ken ammuen dagiti nasayaat a wagas tapno maawatan dagiti pagdaldalananda.
Mental Health Programs iti siudad ti Baguio, agtultuloy nga idiaydiaya ti City Health Services Office
Imbinglay ni Cyra Policarpio, Registered Nurse Mental Health Assistant iti City Health Services Office nga agtultuloy dagiti programa ti nasao nga opisina nu maipapan iti mental health iti siudad ti Baguio.
Iti pannakiuman ti Bombo Radyo kenkuana, impettengna nga agtultuloy ti panangidiayada kadagiti aktibidad ken programa seknan iti panang-address iti mental health iti siudad kadagiti anyaman nga edad.
Sigun kenkuana, tapno makakiddawda iti tulong manipud iti nasao nga ahensya, adda ti Baguio City Helpline a mabalinda nga awagan manipud 8:00 ti agsapa agingga alas-5 ti malem manipud Lunes agingga Biyernes para kadagiti mental health psychosocial support.
Mabalinda metlaeng a maawagan babaen iti numero a 0919- 069- 6361.
Malaksid iti dayta, adda metlaeng iti libre a mental health medication para kadagiti kwapilikado nga indibidual a dumaldalan iti mental health issues.
Impeksana a napateg metlaeng nga awaganda ti 911 Smart City Command Center gapu ta paset dagitoy kadagiti nagsanay para iti panang-address kadagiti Mental Health concerns.
Mangipatpatungpalda metlaeng kadagit aktibidad babaen kadagiti student-peer facilitators iti siudad. //kcs//
