Ngimmato ti vehicular traffic accident a nailista ti Police Regional Office Cordillera-PROCOR manipod Enero 1 agingga idi Abril 22 nu idilig iti datus dagitoy idi napan a tawen.
Iti interview ti Bombo Radyo baguio kenni PROCOR PIO- PCAPT. Marnie Abellanida, kinunana a nadoble iti 527 ti VTA wenno aksidente iti kalsada a nailista ti rehiyon ita nga tawen manipod iti 255 a nailista iti kapada a panawen idi 2021.
Nailista iti Baguio City ti kangatoan wenno 240 nga aksidente; sarunoen ti Benguet nga 167; Abra nga 63; Kalinga nga 35; Ifugao nga 31; Mt. Province nga 19 ken Apayao nga siyam.
Kangrunaan a rason ket ti mechanical failure ken human error.
Umap-apela daytoy iti doble met a panagannad dagiti motorista ken biaheros nangruna kadagiti nagsasaruno a VTAs a nailista kabayatan ti Semana Santa agingga idi kalman a nakatayan pay dagiti biktima.
Inyunay-unayna a nasken a sukimaten nu nakasagana wenno adda iti kondisyon ti lugan malaksid iti bukod a bagi nangruna kadagiti drivers.
Agtultuloy met ti assistance nga ipapaay dagiti personnel PNP a naiwaras kadagiti checkpoints wenno kadagiti kalkalsada iti nagduduma a paset ti rehiyon a mabalin a pagkiddawan dagiti motorista nu maobserbaranda ti parikot iti lugan dagitoy ken maliklikan ti aniaman nga aksidente.
