BAGUIO CITY – Kidkiddawen ti Presidential Anti – Corruption Commission (PACC) ti panagkaykaysa para iti panakapatibker ti kampanya ti nasyonal a gobyerno kontra iti korapsiyon babaen iti panangipasdek dagitoy iti “Katarungan Desk” kadagiti amin nga opisina ti gobyerno ken parapubliko a lugar iti rehiyon.
Sigun kenni Commissioner Greco Belgica, ti Katarungan Desk ket one-stop shop a mabalin a pangireklamoan ti publiko iti aniaman a kita ti korapsiyon wenno panag-abuso dagiti empleyado ken opisyal ti gobyerno.
Kinunana a nasken a mangilatang dagiti ahensia ti gobyerno ken lokal a gobyerno iti lamisaan a nakabilan ti poster ti PACC nga agserbi kas Katarungan Desk a bantayan ti maysa a personnel.
Dinakamatna nga adda ti ‘dulugan’ forms a pangisuratan dagiti tattao iti reklamo dagitoy ken adda ti drop box a pangikabilanda iti nasao a form.
Kolektaren ti PACC dagiti forms ken tratuenda dagitoy nga addaan iti confidentiality sakbay a maipasidong iti beripikasyon ken imbestigasyon sakbay a maisumitir iti opisina ni Presidente Duterte para iti kaskenan nga aksiyon.
Immapela pay ni Belgica kadagiti opisyal iti Cordillera iti panagipasdekda iti Katarungan Desks iti masakupan dagitoy ken iti panakaituding ti aldaw ti regional launching a personal to a dar-ayanna.
Impasigurado met ni Cordillera Association of Regional Executives President ken Office of Civil Defense – Cordillera Regional Director Albert Mogol ti sibubukel a suporta ti asosasyon iti nasao a kampanya ti nasyonal a gobyerno.
