Umaw-awat ti pammadayaw ni Police Cadet Bernard Carlos Dawayen kalpasan a daytoy ti Top No. 8 iti kaleppas a 45th Philippine National Police Academy Commencement Exercises ti ‘Layag-Diwa’ Class of 2024.
Ni Dawayen, tubo ti Sabangan, Mt. Province ket isu ti agmaymaysa a Cordilleran cadet a karaman kadagiti Top 10 honor roll ti Philippine National Police Academy Class of 2024 ken daytoy met laeng ti kaunaan a nagturpos iti nasao nga akademya manipud Sabangan.
Iti panakiuman ti Bombo Radyo kenni Dawayen, impeksana ti nalaos a kinaragsakna gapu ta kalpasan dagiti karit ken rigat a nagdalananna ket adda a naragpatna ti panagbalinna kas Police Liutenant.
Imbinglay ni Dawayen a saanna a panggep ti agbalin a pulis gapu ta ti kurso daytoy idi adda iti kolehiyo ket Bachelor of Science in Applied Statistics ken kalpasan ti panagturposna iti nasao a kurso ket nagtrabaho daytoy iti Philippine Statistics Authority (PSA).
No pay kasta, iti panagleppas ti kontratana ket kinasapulanna ti agbirok ti sabali a trabaho rason para iti panag-aplikarna iti Philipinne National Police (PNP) ken Philippine National Police Academy (PNPA).
Sigun kenni Dawayen, immuna a naakseptar daytoy iti Philippine National Police ken nagserbi kas Patrol Man ngem saan daytoy a nagsardeng a nagaplikar iti Philippine National Police Academy.
Kinuna ni Dawayen a ti nagbalin a karit iti panagserrekna iti akademya ket ti atidog a proseso daytoy a dumanon iti maysa a tawen no sadino dagiti screening process ket pakairamanan ti physical agility test, psychological ken psychiatric examination, physical, medical ken dental examination ken ti panel interview.
Kadagiti proseso a nagdalan daytoy ket kinunana a saan unay daytoy a narigatan agsipud ta kas Cordilleran ket adda nga ammona ti rigat ken napadasanna ti aggarden, ti agtrabaho iti konstruksyon ken daduma pay.
Kabayatanna, impeksa ni Dawayen a rumbeng a saan a ti kinarigat ti agbalin a lapped iti pananggun-od kadagiti arapaap no diket aramiden tayu daytoy nga inspirasyon tapno adda a mas tulungan tayu ti bagi tayu ken ti panagporsege pay.
Innayonna pay a no adda ti arapaap tayu ket rumbeng nga aramiden tayu amin ti kabaelan tayu gapu ta awan ti imposible.
Iti agdama, kinuna ni Dawayen nga ur-urayenda laeng ti agbalin nga instruskyon wenno designasyon para kadagitoy.//M
