Kinumpirmar ni Mayor Joy Belmonte iti Quezon City a napan iti derma clinic ken illegal spa sadiay Quezon City ti kaunaan a nagpositibo iti mpox wenno monkeypox virus iti pagilian, no sadino naaddaan daytoy iti intimate contact tallo a lawas sakbay a nangrugi ti sintomas.
Sigun kenni Belmonte, dua pulo ket walo (28) kadagiti uppat a pulo ket maysa (41) a nakapolapolna ti naipasidong iti self quarantine ken manarimaan ti monitoring ti Quezon City Health Department kadagitoy.
Karaman kadagiti naipasidung iti quarantine ti masseuse ken sumagmamano a dadduma pay a kliyente ti illegal spa a nagtaudan ti nasao a kaso babaen iti sexual encounter.
Gapu iti dayta, imbilin ti nasao nga opisial ti pannakairikep ti spa apaman a naduktalan daytoy nga awanan iti mayor’s permit ken dadduma pay a kasapulan a dokumento.
Malaksid iti dayta, nakaaktibo metten ti quick response team iti nasao a suidad tapno mataming ti nasao a sitwasyon.
Immuna nga inwaragawag ti Department of Health (DOH) a ti 33-anyos a lalaki a Filipino national nga awan ti travel history iti ballasiw taaw, ket isu ti kaunaan a kaso ti mpox ita a tawen, nu sadino nakumpirmar a naddaan daytoy iti intimate contact a mapapati a nagtaudan ti nasao virus.
Nangrugi dagiti sintomas iti gurigor, panagruar dagiti bukol iti kudil ti rupana, likud, luppo ken dadduma pay a paset ti bagi daytoy.
Maipalagip nga indeklara ti World Health Organization (WHO) idi napan a lawas a ti mpox ket global public health emergency iti maikadua a gundaway iti dua a tawen, kalpasan ti panagraira ti viral infection idiay Democratic Republic of Congo a nagwaras kadagiti kabangibangna a pagilian.
