BAGUIO CITY – Nailista ti kaunaan a kaso ti uram idiay #24 Purok 18, Irisan, Baguio City idi Enero 2.
Ti nasao a balay ket 3-storey residential house a tagikua ni William Canua, maysa a taxi driver.
Malaksid iti pamilya ni Canua nga agnanaed iti 2nd floor ken 3rd floor ti balay, agab-abang ti tallo nga estudyante ken maysa a 24-years old, BJMP personnel iti first floor ti balay.
Iti interview ti Bombo Radyo kenni Canua, awan ti tao iti balayda idi napasamak ti uram ta nagbakasyon dagiti boardersda bayat a rinumuar dagiti annakna.
Sigun kenni SFO2 Rodolfo Villanueva, naawatda ti awag maipapan ti uram iti 5:18 ti malem ken naideklara daytoy a fire out iti 6:11 metlaeng ti malem.
Innayonna pay a dimmanon iti first fire alarm ti nasao nga uram.
Nupay kasta, agarup P2-million pesos ti inisyal a danyos dagiti nauram a sanikua.
Manarimaan met ti imbestigasyon dagiti operatiba iti rason ti uram.
Kabayatanna, naipaayan met ti pamilya a biktima ti uram ti food packs manipud iti local government unit ti nasao a barangay.
Kinuna pay ni Canua a temporaryo a makinaedda iti pagtaengan ti kabagianda iti nasao metlaeng a barangay.
