![](https://img.bomboradyo.com/baguio/2019/04/mangan-tako-2.jpg)
BAGUIO CITY – Maim-imbitaran dagiti kayatda ti makaraman kadagiti nainsigudan a putahe, taraon ken makmakan manipud Cordillera Region iti karugrugi ken kaunaan a ‘Mangan Tako’ Cordillera Food Fair.
Nailukat ti aktibidad idi agsapa sadiay Rose Garden ti Burnham Park ditoy siudad ti Baguio ken agleppas daytoy inton April 14.
Nagtaud ti pannarita a ‘mangan tako’ iti dayalekto dagiti kankana-ey iti probinsia ti Benguet a kaipapananna ket ‘mangan tayo’.
Sigun kenni Department of Tourism – Cordillera OIC Regional Director Jovita Ganongan, proyekto daytoy ti ahensiada iti panakibinnadang ti city government ti Baguio ken ti Department of Agriculture.
Kinunana a maysa daytoy a baro a tourism experience ken tampok dagiti heritage food culture manipud kadagiti probinsia ti Abra, Apayao, Benguet, Ifugao, Kalinga ken Mountain Province.
Innayonna a puntirya ti gobyerno a babaen iti nasao a food fair ket maramanan ken agbalin a pamilyar ti publik kadagiti nalalatak a taraon ken putahe nga ididiaya ti Cordilleras.