BAGUIO CITY – Inreport ti City Health Services Office (CHSO) ti kaunaan a panagimbag wenno panagrekober ti maysa kadagiti positibo a kaso to COVID-19 a nailista ti Baguio.
Maibasar iti datus ti CHSO, nagnegatibo ti maikadua a test ti nasao a pasyente kabayatan ti panagpa-agas daytoy iti maysa a Level 3 a health facility sadiay Metro Manila.
Naamuan a ti nasao nga indibidual ket ti 55-anyos a lalaki manipud Metro Manila a miembro ti maysa kadagiti Chambers of Congress ken kaunaan a positibo a kaso ti COVID-19 a nailista ti Baguio.
Nagbiahe daytoy manipud Makati City paturong ditoy Baguio ken nakarikna kadagiti sintomas ti COVID-19 idi March 12 sakbay a naiturong iti Level 3 a health facility sadiay Metro Manila para iti kanayonan a medical tests agingga a nagnegatibo iti makapapatay a virus.
Gapu iti daytoy, nagbalinen a tallo ti positibo a kaso to COVID-19 ditoy Baguio ngem addan dagitoy iti natalged a kasasaad bayat a maur-uray ti resulta ti confirmatory test dagiti dua a presumptive positive COVID cases ken ti maysa a presumptive positive COVID case a pimmusayen.
Nainget met a mabambantayan ti kondisyon dagiti 25 a persons under investigation (PUIs) ti Baguio nga adda ita kadagiti Level 3 a health facilities bayat a manarimaan ti home isolation dagiti 311 a PUIs.
