BAGUIO CITY – Balligi ti umuna a panakipaset ti Igorot pride ken muaythai world champion a ni Ariel Lee Lampacan iti Southeast Asian (SEA) Games.
Sipapannakkel ti 29-anyos nga atleta ken sigud a minero iti nagun-odna a balitok a medalya iti muay thai event iti agtultuloy a 2019 SEA Games.
Iti interview ti Bombo Radyo, inyestoriana a kabayatan ti ay-ayamda iti nakalabanna a Thai ket bimmawi daytoy iti puntos babaen iti boksing ken inaklonna a narigatan daytoy iti kinnugtar.
Ni Lampacan a nagtrabaho iti minasan iti las-ud ti tallo a tawen ket maysa a world champion iti muay thai kalpasan a nangabak daytoy iti gold medal iti International Federation of Muaythai Associations World Championship a naangay sadiay Mexico idi napalabas a tawen.
Iggem pay ni Lampacan ti uppat a pangabak ken maysa a panaka-abak iti mix martial arts career daytoy.
