Nakaruaren ti kaunaan a pasyente ti kidney transplant itay nabiit kalpasan nga impakitana ti senyales ti panagrekober, bayat a ti kabsatna a nangidonar iti kidney ket naud-udi a nadischarge.
Ti pasyente ket agtawen iti 34-anyos a babai manipud iti suidad ti Baguio no sadino nabayagen daytoy a lumablaban iti Chronic Kidney Disease (CKD) Stage 5, secondary to Diabetic Kidney Disease.
Malaksid iti dayta, naipasidong pay daytoy iti hemodialysis tallo a daras tunggal lawas gapu iti Type I Diabetes Mellitus.
Sakbay ti nasao nga operasyon, nagdalan pay ti pasyente iti nainget a pre-operative clearance process, pakairamanan ti naan-anay a donor-recipient matching rason a successful ti operasyon.
Gapu iti daytoy, napadayawan dagiti multidisciplinary team iti Baguio General Hospital and Medical Center (BGHMC) no sadino indauluan daytoy ni Dr. Kristoffer Ted Angala ti Main Attending Kidney Transplant Nephrologist, kaduana da Transplant Surgeon Dr. Noli Velasquez Urosurgeon Dr. Carlos Dumlao ken dadduma pay.
Ti nasao nga achievement ket kas maitunos iti vision wenno sirmata ti hospital nga agbalin kas Prime Multispecialty Center iti Northern Luzon.
Kabayatanna, maipalagip nga immunan metlaeng a binigbig ti Department of Health ti nasao a ospital kas accredited facility para iti kidney transplants sipud pay idi 2022.
