BAGUIO CITY – Nagbiahen idi kalman ti kaunaan a parapasahero a bus ti maysa kadagiti kompanya ti bus a napalubusan nga agbiahe paruar ken pauneg ditoy Baguio City.
Nagturong ti nasao a bus sadiay Cubao, Quezon City ken naglaon daytoy iti 15 a pasahero nga addaan ti kompleto a dokumento, partikular ti medical certificate, valid government issued ID ken travel authority.
Sinukimat met ti LTFRB ti uneg ti nasao a bus tapnu makita no nasurot dagiti naikalikagum a kondisyon sakbay a naipalubos ti panagbiahe dagitoy.
Naobsebaran met ti social distancing kadagiti tugawan, nangruna ta one-seat apart dagiti pasahero ken adda ti naikabil a plastic barrier malaksid a naala ti temperatura dagiti pasahero sakbayda a nakastrek iti bus.
Kabayatanna, iti kapada a bus company ket tallo ti biahe daytoy paturong sadiay Cubao inton bigat ken tallo met a biahe paturong ditoy Baguio inton Lunes.
Naamuan nga addaan metten ti terminal ti nasao a bus company iti bukodda a triage center ken tunggal bus ket 24 laeng nga indibidual ti mabalin nga ilugan daytoy.
Kabayatanna, dinakamat ni LTFRB-Cordillera regional director Engr. Lalaine Sobremonte a nakasaritanan dagiti regional directors ti LTFRB sadiay Region 1 ken Region 2 seknan iti panakaipalubos ti panagbiahe ti bus paturong sadiay manipud ditoy Baguio.
Nupay kasta, naamuan nga awan pay ti pammalubos ti LGUs sadiay iti baet nga adu dagiti agkidkiddaw para iti panakailukat ti biahe ti bus paturong iti Ilocos Region ken Cagayan Valley.
