BAGUIO CITY – Naiyusuat ita nga aldaw ti nagduduma nga aktibidad para iti kaunaan a Saleng Festival ditoy Baguio City nga addaan tema a “Restoring Our Ecosystem Together”.
Maitunos daytoy iti Baguio Environment Code a mangimanmandato iti panakaipatungpal ti aktibidad ditoy siudad tunggal Hunyo agingga Setyembre a panawen ti panagmumula.
Panggep ti aktibidad a maimpormaran ken maallukoy dagiti residente a makipaset iti urban forest management program ti siudad.
Nagduduma nga aktibidad ti maisayangkat kabayatan ti festival a marugian iti panakarambak ti World Environment Day inton June 5 babaen iti bamboo planting, libre nga emission testing, cycling for the environment ken panakairang dagiti upcycled materials.
Mapirmaan met ti katulagan para iti Beetle Trap Project ditoy siudad a sarunuen ti panagmula ti jacaranda saplings ken community tree planting.
Maisayangkat pay ti panagmula ti pine saplings ken elder berry tree, barangay clean-up drive, panangiparang iti Tree of Life, tree cart parade, bonsai exhibit ken dadduma pay, pakairamanan ti panakabigbig dagiti nakaipaay ti naidumduma a kontribusyon iti aglawlaw babaen iti Green Thumb Award.
