Pagsagsaganaan ti lokal a gobyerno ti Bontoc, Mountain Province ti mapadpadaanan a Southeast Asian Trail Running Cup a maangay iti nasao a munisipyo mangrugi inton June 19 agingga June 23 iti agdama a tawen.
Manamnama a pakipasetan daytoy ti sangagasot nga elite runners nga agtaud kadagiti nagduduma a Southeast Asian Countries pakairamanan ti Brunei, Cambodia, Malaysia, Indonesia, Singapore, Thailand, ken ti Vietnam.
Iti agdama, manarimaanen ti panagsanay dagiti dua pulo(20) nga elite runners ti Pilipinas a makipaset iti nasao nga aktibidad nu sadino, panggepda nga ipakita ti abilidad dagitoy kas maysa nga atleta.
Ti delegasyon ti Pilipinas ket immunan a nakipaset iti World Mountain Tril Running Championship idi napalabas a tawen nu sadino, nagun-od dagitoy ti maika sangapulo ket siam a pwesto iti kategorya ti long trail bayat a maika dua pulo ket pito met dagitoy iti short trail.
Karaman kadagiti kategorya a mabalin a pakipasetan dagiti elite runners ti long trail, short trail, mountain classic, ken vertical uphill.
Manamnama met a maipaayan ti titulo a Team Champion dagiti delegasyon nga agballigi iti long trail ken short trail.
Malaksid kadagiti nadakamat a kategory, silulukat paylaeng met ti panagparehistro kadagiti agtariggy a makipaset iti open category pakairamanana ti 42km marathon, 21km marathon, ken ti 12km mountain classic nu sadino, mabalin a mapangabakan dagiti makipaset ti PhilTRA 2024 Championships Qualifier Points ken ti Southeast Asian Trail Cup Age Group Champion title.
Ti Southeast Asian Trail Running Cup ket agserbi kas plataporma tapno maipakita dagiti athleticism, sportmanship, ken cultural exchange kadagiti makipaset kasta met nga agbalin a wagas tapno ad-adda a maitandudo ti turismo iti Mountain Province.//Celeste Galuten
