BAGUIO CITY – Naiyusuaten ditoy Baguio City ti kaunaan nga e-Eskwela Hub iti pagilian kasaruno ti panakailukat dagiti walo a kompyuter a nakakonetar iti internet ken dua a printers a naimuntar iti Baguio City Library.
Agpaay ti e-Eskwela Hub kadagiti estudyante tapnu adda ti aramaten dagitoy kagiddan ti blended learning a sistema ti edukasyon iti masungad nga school year.
Gapu iti daytoy, agbalin a libre ti panaka-aramat dagiti nasao a kompyuter, ti panagaramat iti internet ken panangimprenta kadagiti modules ken dadduma a paper works a nasken nga isumitir dagiti estudyante.
Malaksid kadagiti estudyante, nakalukat ti e-Eskwela hub kadagiti mannursuro ken nagannak a mangtultulong kadagiti annakda iti online learning ken blended learning.
Naamuan nga iti panagimprenta ket libre ti umuna a 10 a panid dagiti dokumento.
Maikalkalikagum ti panagrehistro nga umuna dagiti estudyante ken mannursuro iti barangay hall dagitoy ken maipaayanda iti stub bayat a maipatungpal dagiti kaseknan a protocol tapnu maipasigurado a saan a maistrek iti pasilidad ti COVID-19.
Ti e-Eskwela hub ket paset ti pilot program ti maysa a pribado a kompanya iti koordinasyon ti lokal a gobyerno ti Baguio City ken maysa a kongresista tapnu maipasigurado nga awan dagiti estudyante a maibati iti baro a sistema ti edukasyon iti pagilian.
