BAGUIO CITY- Nakalukat paylaeng ti Kennon Road para kadagiti motorista nupay masansan a mapasaran ti panagtudo iti lokalidad.
Iti panakiuman ti Bombo Radyo Baguio, kinuna ni Frankie Cortez, Chief Operation ti OCD-Cordillera, mailukat ti maysa a lane ti kennon road tunggal dominggo mangrugi iti oras ti alas singko ti agsapa agingga iti agsapa ti lunes ngem para laeng kadagiti outbound wenno dagiti rumuar iti Baguio City.
Dinakamatna a mangrugi met iti oras ti alas 5:01 am ti Lunes agingga 4:59 am ti Domingo ket mailukat para kadagiti inbound wenno dagiti sumrek iti Baguio City.
Inlawlawagna a mailaksid iti nasao nga iskidyul dagiti residente sadiay.
Nupay kasta, impaganetget ni Cortez nga anyaman nga oras ket mabalin a mairikep ti Kennon Road nangruna nu saan a napintas ti sasaaden ti panawen.
