Pinatgan dagiti Trial judges ti International Criminal Court (ICC) ti kiddaw ti prosecution a ma-freeze ti kuarta a nakompiskar kenni sigud a president Rodrigo Duterte.
Ti nasao a kuarta ket nakompiskar kenni Duterte, kabayatan ti pannakaarestar ken pannakaiturongna iti international tribunal idi March 2025.
Kabayatanna, kidkiddawen ti prosecution ti access kadagiti dadduma pay a banag a nakumpiskar manipud iti sigud a presidente.
Iti baet a saan a kontraen ti depensa ti kiddaw ti prosekusion a mangsukimat iti sumagmamano kadagiti nakumpiskar a banag, indagadag ti abogado ti depensa a ni Peter Haynes kadagiti hues a saanda nga ipalubos ti pannakagun-od kadagiti tulbek a nakompiskar kenni Duterte.
Dagiti nasao a tulbek ket agdama nga adda iti kustodia ti ICC Registry.
Kabayatanna, kiniddaw ti depensa iti prosekusion nga aramidenda dagiti maitutop nga addang tapno malimitaran ti pannakagun-od iti personal nga impormasion a kukua ni Duterte ken ti pamiliana a saan a mainaig iti imbestigasion.
