BAGUIO CITY – Naaprobaran ti petisyon para iti pannakaipangato ti minimum a sweldo dagiti mangmangged iti rehiyon Cordillera.
Iti interview ti Bombo Radyo Baguio ken Department of Labor and Employement (DOLE) Cordillera Regional Director Nathaniel Lacambra, nairuwar ti baro a minimum wage order manipod iti Regional Tripartrite Wages and Productivity Board Cordillera.
Kinunana a manayunan ti 50 agingga 60 pesos a minumum a sweldo kadagiti mangmangged iti rehiyon ngem magudwa iti dua a tranches.
Inlawlawagna nga in-inot paylaeng a bumangbangon dagiti negosyante manipod iti pandemya isut gapu a ginudwada daytoy.
Kinunana nga iti umuna a tranche ti wage increase ket dumanon iti 380 ti naideklara kas minimum wage.
Iti Baguio City, Tabuk City ken La Trinidad, Benguet ket manayunan iti 30 pesos ti sigud a 350 bayat a dagiti dadduma a lugar nga addaan iti 340 a minimum a sweldo ket manayunan iti 40 pesos.
Dinakamatna a maur uray laengen iti panang aprobar ti National Wages and Productivity Board Commission iti daytoy sakbay a naan anay a maipatungpal.
Innayunna a maipatungpal met inton Enero 1, 2023 ti maikadwa a trance nu sadino, manayunan iti P20 ti sweldo tapnu agbalin a P400 ti minimum a sweldo iti rehiyon.
Kabayatanna, kadagiti babassit a negosyo a marigatan iti wage increase ket kinunana nga adda ti provision of exemption a mabalinda nga applyan tapnu saanda a mairaman iti daytoy.
Mainaig iti dayta, maipangato metlaeng ti sweldo dagiti katulong agsipod ta naibilin iti saan a pannakaibaba iti 4,500 a sweldoda manipod iti sigud a 4000 iti tunggal bulan.
