Immanamong ti gobierno ti pagilian a Pilipinas iti kiddaw ti Estados Unidos a temporaryo a pagkamangan dagiti Afghan ti pagilian bayat ti pannakaproseso ti special immigrant visa-da nga ipaay kadakuada ti America.
Agserbi ti pagilian kas “US immigrant visa processing center” para kadagiti Afghan nationals a dumanon iti agarup sangagasot lima pullo agingga iti tallo gasot nga aplikante.
Nagtrabaho dagiti Afghan iti gobierno ti Estadus Unidos idiay Afghanistan ken naibilangda a “eligible” para iti United States special immigrant visa.
Nupay kasta ngem nabati dagitoy idi pimmanaw ti Washington iti nadakamat a pagilian kalpasan a nagballigi dagiti militante a Taliban idi 2021.
Maipalagip nga immuna a kiniddaw ni US Secretary of State Antony Blinken kadagiti counterpart ti nasao nga addang idi 2022 ken napagsasaritaanda daytoy kenni President Ferdinand Marcos iti Estados Unidos itay napan a tawen.
Saklawen ti gobierno ti Estadus Unidos dagiti gastos iti panagtalinaed dagiti Afghan nationals iti pagilian, pakairamanan ti gastosda iti taraon, balay, seguridad, medikal ken transportasion.
