BAGUIO CITY – Saan nga isanod ti maseknan a transport sector ti petisyon dagitoy a mangkidkiddaw iti panakaipangato ti P3 a plete kadagiti parapasahero a jeep ditoy Rehion Cordillera ken iti Ilocos Region.
Iti panakiuman ti Bombo Radyo Baguio, impetteng ni Pat Evangelista, presidente ti Federation of Jeepney Operators and Drivers Association ti Baguio-Benguet a nakapilan ti nasyonal a gobyerno ti nasao a petisyon.
Kinunana nga iti kinapudnona ket panggepda pay a mangipasa ti supplemental petition a mangkidkiddaw iti kanayonan pay a fare increase kas maitunos iti agtultuloy nga ingangato ti presyo dagiti produkto a petrolyo.
Inlawlawagna a ti kidkiddawenda a kanayonan a plete kadagiti parapubliko a jeep ket para iti naannayas ken nasaysayaat nga operasyon dagitoy nangruna ta maysa ti sektor ti transportasyon kadagiti kangrunaan a naapektaran iti agdama a pandemya.
Inaklonna a manipud naipasa ti nasao a petisyon ket adu dagiti naaw-awatda a mensahe manipud kadagiti maseknan nga ahensia, no sadino maysa ditoy ti naikari a subsidiya a P5,000 kadagiti driver.
Nupay kasta, inlawlawag ni Evangelista a kasapulan met a maipaayan ti subsidiya dagiti small-time operators ken saan pay nga umdas ti nasao a gatad no idilig iti baybayadan dagitoy a buis.
Dinakamatna pay a saandan nga agdependar iti subsidiya nga ipapaay ti gobyerno gaputa agurayda manen ti mano a bulan sakbay a maalada ti naikari a gatad ken saan nga amin a driver ket maipapaayan iti daytoy.
Kinunana pay a wagas laeng daytoy ti gobyerno tapno maallukoyda a saanen a mangituloy ti petisyon.
