Balligi a naipatungpal ti kick off program ti Bureau of Fire Protection-Cordillera para iti panakaobserbar ti National Fire Prevention Month 2025 sadiay Melvin Jones Grandstand ita nga aldaw.
Para ita a tawen, ti tema ket “Pag-iwas ng Sunog, Hindi Ka Nag-iisa.”
Iti nasao a programa, ti nagbalin a guest of honor ken speaker ket da Department of the Interior and Local Government-Cordillera Regional Director Araceli San Jose, BFP National Headquarters Director for Operations Fire Chief Superintendent Rizalde Castro ken daduma pay.
Impeksa ni Castro a tarigagay dagitoy ti natalged a pagilian kasta met ti “fire-free community.”
Iti panakiuman ti Bombo Radyo kenni Fire Senior Superintendent Robert M. Pacis, Bureau of Fire Protection-Cordillera, ti panaka-obserbar ti Fire protection month ket agserbi kas palagip iti publiko nga agannad ken kitaenda ti pagtaengan dagitoy.
Kabayatanna, maguyguyogoy ti publiko a makipaset iti maisayangkat a “Takbo laban sunog” inton Marso a kinse sadiay Burnham Park, Baguio City.
Daytoy ket open kadagiti amin a kayatna a makipaset ken awan ti mabayadan.
Malaksid iti dayta, maangay met laeng ti “Fore Square Roadshow” sadiay Tabuk city inton maudi a lawas ti Marso kasta met a maangay ti open barracks kadagiti estudyante.
Ti open barracks ket kasla seminar a maipakita kadagiti estudyante no kasano ti trabaho dagiti fire officers.//Bombo Noveh Organo
