BAGUIO CITY – Dakkel ti bimmabaan ti bilang dagiti matiltiliw a walang nga aso iti maysa a barangay ditoy siudad ti Baguio gapu iti presensia dagiti dog traps.
Sigun kenni BGH Compound Punong Barangay Ronaldo Garcia, adda ti katulaganda iti Baguio City Veterinary Office – Agricultural Services Division mainaig iti panakaimuntar dagiti dog traps iti aglawlaw ti barangay.
Sagudayen ti katulaganda a mamulta iti P200 dagiti pet owners apaman a makatiliw ti taraken dagitoy nga aso babaen iti dog trap.
Kinunana a maipaima iti nasao nga opisina dagiti natiliw a walang nga aso no saan a sakaen dagitoy dagiti agtagikua.
Dinakamat pay ni Kapitan Garcia a nakatiliwdan ti tallo a walang nga aso ita a bulan babaen kadagiti naimuntar a dog traps iti barangayda.
Ipalpalagipna metlaeng ti panagbalin dagiti residente a responsable nga agtaraken ti aso tapno maliklikan dagiti parikut a posible nga itunda dagiti agkatangkatang nga aso kadagiti kalkalsada. (report ni Bombo Razced Pagoli)
