Irekreklamo dagiti motorista ti kinaawan ti regular a flagman a mangimanmando iti taray ti trapiko iti manarimaan a road rehabilitation project iti singking area ti Naguilian wenno Quirino Highway, sadiay Banangan, Sablan.
Sigun kadagiti dadduma a motorista, awan ti flagman nga agwanwanawan sadiay iti dis-oras ti rabii.
Gapu iti daytoy, adda dagiti gundaway nga agsisinnabat dagiti lugan iti nailet a paset ti kalsada a pakaipatpatungpalan ti patrabaho.
Naammuan a ti proyekto ket ipatpatungpal ti DGO Construction iti sidong ti DPWH Benguet First District Engring Office.
Addaan daytoy iti P16.044-M a pundo a nangrugi idi Hulyo 14, 2025, ken naituding a malpas inton Nobiembre 10, 2025.
Sigun met kenni Sablan Mayor Alfredo Dacumos Jr., saan a nayuman a nasaksakbay kadakuada ti nasao a patrabaho ken dagiti dadduma pay a proyekto ti DPWH iti nasao a munisipyo.
Kinunana a rumbeng kuma nga ikoordinar nga umuna ti nasao nga ahensiya ti aniaman a patrabaho ken program of works nga ipatungpalda iti nasao a munisipyo tapno maamuan dagiti lokal nga opisyales ti detalye dagitoy a para iti nasaysayaat nga implementasyon dagitoy.//Bombo Alfred Pudsoc
