Impakaammo ni Presidential Security Command (PSC) commander Rear Admiral Andro Val Abayon nga awan ti nadutukan a presidential security personnel para kenni Senator Imee Marcos iti agdama.
Sigun kenni Abayon,awan ti Presidential Security Command (PSC) personnel a nadutukan para kenni Senator Marcos sipud idi nagtugaw daytoy kas commander idi November 2025.
Nupay kasta,kinuna daytoy nga addaan iti presidential security ti sabali pay a kabsat ni President Ferdinand Marcos Jr. a ni Irene Marcos.
Kagiddan dayta, impanamnama ni Abayon a makisarsarita daytoy kenni Senator Marcos para iti panakaipaay iti presidential security personnel para kenkuana kasa metten ti panakaisagana dagiti security teams.
Kabayatanna,impetteng met ni Senate President Pro Tempore Panfilo “Ping” Lacson a pagrebbengan ti PSC a protektaran dagiti kakabsat ti presidente ken saan daytoy maysa a banag a pagdesisyunan ni Senator Marcos.
Mainaig iti dayta, inlawlawag met ni Palace Press Officer Undersecretary Atty. Claire Castro a ti kinaawan ti presidential security personnel para kenni Senator Imee Marcos ket saan a gapu iti maatap a suppiat dagitoy iti kabsatna a ni President Marcos Jr.
