BAGUIO CITY – Mangnamnama ti lokal a gobyerno ti La Trinidad, Benguet a manayunan pay dagiti bakuna kontra iti COVID-19 a maawatda manipud iti nasyonal a gobyerno kalpasan a nagkurang ti kaudian a suplay ti nasao a bakuna a naipaay kadakuada.
Sigun kenni Mayor Romeo Salda, nagkurang ti naawatda a 1,000 doses ti AstraZeneca vaccine a naipaay kadagiti senior citizens sadiay gaputa adu kadagitoy ti nagturong iti vaccination area iti baet a saan dagitoy a napaka-ammuan iti nasao a panagbakuna.
Kagiddan iti daytoy ket impannakkelna ti panaka-aramat amin dagiti bakuna a naawatda manipud iti gobyerno.
Dinakamatna a puntirya ti lokal a gobyerno ti La Trinidad a mabakunaan ti 70% iti populasyon sadiay a katukad ti 98,030 nupay iti agdama ket dumanon laeng iti 2.2% ti nalpas a nabakunaan.
Innayonna nga iti kanito nga agkurang ti bakuna nga ipaay ti nasyonal a gobyerno ket nakasagana ti P10-M a pondo ti lokal a gobyerno para iti panaggatangda ti bakuna tapnu makompleto ti puntiryada a bilang dagiti mabakunaan sadiay La Trrinidad.
Pinagyamananna met ti in-inot a panagngato ti acceptance rate ti bakuna kontra iti COVID-19 sadiay La Trinidad kagiddan ti agtultuloy a panagbakuna kadagiti adda iti priority list.
Kabayatanna, nainget a pinaglibakan ni Mayor Salda ti sayangguseng nga adda dagiti pabpaboran wenno impangrunada nga indibidual iti panagbakuna kontra iti COVID-19.
Impettengna a sinurotda ti pammilin ti nasyonal a gobyerno seknan kadagiti maipangruna a mabakunaan kas maibasar iti priority list dagitoy.
